Б.БАДРАЛ

Рио-де-Жанейрогийн Паралимпын тоглолтын нээлтээр Оросын далбааг барьж жагссан Беларусийн Спортын яамны ажилтан Фомочкинд оросууд байр бэлэглэв. Энэ тухай Оросын Гадаад хэргийн яамны төлөөлөгч Мария Захарова “Facebook” хуудсан дээрээ мэдэгдсэн байна. Найзынх нь найз нь түүнд хандан Фомочкины зоримог үйлдэлд талархаж байгаагийн илрэл болгон байр бэлэглэх хүсэлтэйгээ хэлээд тус болохыг хүссэн аж. Захарова хүсэлтийг ёсоор болгож яамны шугамаараа Фомочкинтой холбогдон ойлголцолд хүрчээ. Тэрээр “Болсон бүгдийг тоочих хэрэггүй байх. Ямар ч байсан байр жинхэнэ гэдгийг би өөрөө очиж шалгасан. Манай беларусийн баатарт ийм бэлэг өгсөн нууцлаг Монте-Кристо гүн гээч хэн болохыг маргааш олж мэдэцгээгээрэй” гэжээ.  Оросын паралимпын тамирчдыг допинг хэрэглэсэн байж болзошгүй гэсэн үндэслэлгүй хардалтын улмаас шигшээг бүхэлд нь тэмцээнээс хассан юм. Үүний дараанаас Орос оролцоогүй ч далбааг барьж алхах тухай яригдаж эхлэхэд тоглолтын үеэр улс төрийн шинжтэй ямар нэг үйлдэл хийх хориотой гээд Оросыг туг далбааг барьж алхсан улсын тамирчныг төдийгүй шигшээг нь тэмцээнээс бүхэлд нь хасах хүртэл арга хэмжээ авна гэж анхааруулж байв. Гэхдээ л есдүгээр сарын 8-нд болсон нээлтийн ажиллагаан дээр Беларусийн Спортын яамны ажилтан Фомочкин Оросын далбааг мэдэгдүүлэлгүй авч орсон төдийгүй 100 орчим метр газар дэлгэн алхсан. Үүний дараа Оросын далбааг хурааж, Фомочкиныг Паралимпын тэмцээнээс хөөсөн юм.