Оросын хоёр сэтгүүлчийн амийг хөнөөсөн хэргээр ОХУ-д саатуулагдаж байгаад ерөнхийлөгч Владимир Путины өршөөлөөр суллагдсан, одоо Украины парламент Дээд Радагийн депутат Надежда Савченко оросыг “Дэлхийн гуравдугаар дайн өдөөх гэлээ” хэмээн буруутгасан байна. Тэрээр “112 Украина” телевизийн “оройн хөтөлбөр”-өөр ярихдаа ингэж мэдэгджээ.

“Оросын суртал нэвтрүүлэг асар хүчтэй газар авлаа. Оросыг Европын зөвлөлийн парламентын нийгэмлэгт  эргүүлж авах хэрэггүй. Энд тэдний төлөөлөгчдийг суулгах ч хэрэггүй. Ер нь тэдэнтэй яриа хэлэлцээр хийх шаардлагагүй. Орос хэдийнээ дэлхийн гуравдугаар дайны суурийг тавьчихаад байгааг бид мэдэлгүй өнөө хүрч. Бидэнд ийм аюул нүүрлээд байгааг бид аль эрт ойлгох байсан юм” гэж Савченко ОХУ-ыг Европын зөвлөлийн парламентын нийгэмлэгт эргүүлж авах эсэх тухай асуудалд хариулжээ.

Оросыг Европын зөвлөлийн парламентын нийгэмлэгийн гишүүний хувьд санал өгөх эрхийг нь  2014 оны дөрөвдүгээр сард украины зүүн бүс, Крымын үйл явдлаас болдж хассан юм. Харин үүнийг эсэргүүцэж байгаагаа илэрхийлж 2015 онд Европын зөвлөлийн парламентын нийгэмлэг дэх үйл ажиллагаагаа өөрөө зогсоосон юм.