Монголын зохиолчдын эвлэлийн хорооноос жил бүр уламжлал болгон зохион байгуулдаг богино өгүүллэгийн “Утгын чимэг” наадмыг энэ жил шинэ үеийн уран зохиолыг үндэслэгч, их зохиолч Д.Нацагдоржийн мэндэлсний 110 жилийн ойн хүрээнд хийхээр болсон. Энэ жилийн богино өгүүллэг шалгаруулах наадмын товыг ирэх сарын 16-нд хэмээн зарлаж, Монголын зохиолчдын эвлэлийн гүйцэтгэх захирал М.Саруулдалай, Улаанбаатар хотын Нийтийн төв номын сангийн захирал А.Эрдэнэбат, дэд захирал Э.Тайванжаргал нар уг үйл ажиллагааг зохион байгуулах болсноо дуулгасан.

Өдгөө 23 дахь жилтэйгээ золгож буй наадам нь богино өгүүллэгийн урын санг баяжуулах, шинэлэг хэлбэрээр туурвисан, шинэ үеийн уншигчдын оюуны таашаалд нийцэхүйц шилмэл бүтээлийг олны хүртээл болгоход оршдог билээ. Тэгвэл наадамд оролцохыг хүссэн уран бүтээлчдийг  энэ сарын 31 хүртэл бүртгэх юм байна.