Энэ жилийн “Miss World” буюу дэлхийн мисс АНУ-ын Вашингтон хотноо ирэх сард болно.  Арванхоёрдугаар сарын 18 хүртэл үргэлжлэх тус тэмцээнд эх орноо төлөөлөн миссийн тэмцээн А.Баярцэцэг өрсөлдөхөөр болсон билээ. Тэрээр өчигдөр фэйсбүүк хуудсаараа сонирхолтой мэдээллийг хүргэв. “Намайг 8 настай байхад аав минь хөдөө яваад ирэхдээ бяцхан шувуу авч ирж билээ. Шувууны далавч нь гэмтсэнээс аавын машины хамар дээр унаад ирсэн байсан. Бид түүнийг 3 хоног төрөл бүрийн хоол, будаа, жимсээр хооллох гэж хичээсэн ч юу ч идэхгүй байлаа.

Эцэст нь малын эмчид аваачиж үзүүлэхэд “Нөхдөө наадах чинь шонхор байна. Махаар хоолло” гэж хэлдэг байгаа. Ингэж би Жактай анх учирч гэртээ шонхор шувуу тэжээдэг болов. Сарын дараа Жакийн далавч нь эдгэж гэрт тогтохоо болин хаа сайгүй нисдэг болов. Түүнийг тэнгэрт нь тавьж явуулсан мөчийг би хэзээ ч мартдаггүй. Хэдий хүсэхгүй байсан ч гэсэн. Хайр гэдэг харамлаад бариад суухдаа биш харин эрх чөлөөтэй, аз жаргалтай байлгахын төлөө тавьж явуулахдаа юм билээ” хэмээжээ.