Б.БАДРАЛ

Туркийн эрх баригчид сөрөг хүчний улстөрчид ба тэднийг дэмжигч сэтгүүлчдийг баривчилж байгаатай холбоотойгоор тус улсын эсрэг эдийн засгийн хориг арга хэмжээ авч магадгүй тухай Европарламентын тэргүүлэгч Марин Шульц мэдэгдлээ. Тэрээр “Бид Туркийн эсрэг ямар төрлийн эдийн засгийн хориг авч болох талаар Европын холбооныхон бодож эхлэх хэрэгтэй. Энэ оны сүүлээр Туркийн гишүүн болсон гаалийн холбоонд өөрчлөлт явагдах ёстой. Сөрөг хүчнээс парламентад сонгогдсон гишүүд ба сэтгүүлчдийг баривчилж байгаа ийм үед Гаалийн холбоог яаж өргөжүүлэхийг би төсөөлөхгүй байна” гэжээ. Мөн Туркт цаазаар авах ялыг зөвшөөрч магадгүй тухайд хэлэхдээ “Хэрэв Турк цаазаар авах ялыг сэргээвэл Европын холбоонд элсэх тухай хэлэлцээ нь нэг мөр дуусна” гэсэн байна.

Туркийн прокурорын алба курдуудыг дэмжигч Ард түмнүүдийн ардчиллын намаас парламентад сонгогдсон 12 гишүүнийг баривчилсан юм. Дараа нь шүүхийн шийдвэрээр ахин 10 гишүүнийг баривчилсан. Мөн сөрөг хүчний “Cumhuriyet” сонины сэтгүүлчдийг баривчилсан юм.