Энэтхэгийн Ассам мужид эргүүл хийж явсан цэргийн албан хаагчид руу алан хядагчид дайрсны улмаас гурав нь амиа алдаж, дөрөв нь шархадсан тухай “NDTV” суваг мэдээлжээ. Энэтхэгийн армийн төлөөлөгч дэд хурандаа Сунит Ньютон “Алан хядагчид замын дагуу гар аргаар үйлдвэрлэсэн тэсрэх бодис байрлуусан байсан. Түүнийг дэлбэрсний дараагаар цэргийн цуваа зогсоход алан хядагчид эмх замбараагүй гал нээж эхэлсэн” гэжээ.
 
Энэхүү дайралтыг Ассамыг чөлөөлөх нэгдсэн фронт гэж өөрийгөө нэрлэдэг алан хядах байгууллага үйлдсэн гэж Энэтхэгийн албаныхан үзэж байна. Ассамыг чөлөөлөх нэгдсэн фронт /ULFA- United Liberation Front of Assam/  гэгчийг 1979 онд Энэтхэгийн Ассам мужийг тусгаар улс болгох сонирхолтой нутгийн иргэд байгуулсан. Тэд өөрсдийгөө түүхийн явцад Энэтхэгийн мэдэлд хэзээ ч байгаагүй улс гэж мэдэгддэг. “ULFA”  ба Энэтхэгийн арми хорооны зэвсэгт мөргөлдөөнд 10 мянга гаруй энгийн иргэд амь үрэгдсэн тухай мэдээ байна. Энэтхэгийн төв засгийн газар ба армийн эсрэг ажиллагаанд “ULFA” хил залгаа Бутан улсыг нутгийн идэвхтэй ашиглаж, тэнд өөрийн бааз, зэвсгийн агуулах зэргийг байршуулдаг байжээ. 2003 онд Бутаны Засгийн газар ба Энэтхэгийн армийн хамтарсан ажиллагааны явцад “ULFA”-ийн баазуудыг бүрэн устгасан. Мөн хөрш Бангладеш улс нь “ULFA”-ийн эсрэг арга хэмжээнд Энэтхэгийн засгийн газарт тусламж үзүүлдэг. “ULFA”-ийн удирдагчдын нэг гэгддэг Анупа Четиа гэгчийг 2002 онд  тухайн үеийн Пакистаны Ерөнхийлөгч Мушаррафтай уулзсан тухай мэдээ байгааг Бангладешийн сайд нарын нарийн бичгийн дарга Сайед Ашрафул Ислам 2010 мэдэгдсэн явдал нэлээд дуулиан тарьж байсан юм.