АНУ-д олон жил амьдарсан ч нутагтаа ирээд хоёр жилийн нүүр үзэж буй дуучин Э.Минжинсор шинэ уран бүтээлдээ оржээ. Тэрээр эх орондоо ирснийхээ дараа “Бахархмаар авьяаслаг, чадварлаг шинэ залуу дуучид ихээр гарч ирсэн байна. Илүү шинэ содон зүйлийг гаргаж ирнэ гэдэгт итгэлтэй байна. Миний хувьд поп чиглэлийн дуучин. Энэ урсгал чиглэл Америк, тэр дунд Billboard-д тэргүүлэх дуу хөгжим ямар түвшинд хийгддэг зэргийг сонирхон, судалсан. Тиймээс цаашид хийх уран бүтээлүүд минь өнгөлөг, шинэлэг байх болно гэдгийг амлах байна. Ер нь хүний нутгийг зорихдоо өөрийгөө хөгжүүлэх зорилгоо биелүүлсэн гэж бодож байгаа” хэмээн ярьж байсан. Тэгвэл түүний өнгөлөг, шинэхэн шинэ цомог удахгүй гарах бөгөөд цомогтоо орох бүтээлүүдийг тун удахгүй үзэгчдэд хүргэж эхлэх гэнэ.
Найман жил тайзнаас хөндийрсөн тэрээр өнгөрсөн жил өөрийн мини тоглолтоо зохион байгуулсан. “Spike” хамтлагаас урлагийн ертөнцөд хөл тавьсан тэрээр хамтлагтайгаа болон бие даасан чамгүй бүтээлтэй. “Ил далд”, “Шидэт алим”, “Цэнхэр тагтаа” зэрэг зургаан цомог гаргасан байдаг.