Америкийн Калифорни мужийн лалын гурван ч сүмийн захиргаанд “дэлбэлнэ” гэсэн сүрдүүлэг бүхий захидал ирснээр цагдаагаас хамгаалалт хүсчээ.

“Los Angeles Times”-т бичсэнээр яг адил үгтэй, гараар бичсэн энэ захидлуудад “АНУ-ын Ерөнхийлөгчийн сонгуульд ялсан Дональд Трамп “Америкийг гадаадынхнаас цэвэрлэнэ гэсэн. Тэхдээ та нараас, лалынхнаас эхэлнэ” хэмээгээд АНУ-д лалынхантай тэмцэх нь  “Гитлер еврейчүүдтэй тэмцсэн шиг байх болно” гэж заналхийлжээ.

Калифорнид лалын шашны сүм рүү заналхийлэх явдал нэг биш удаа гарч байгаа юм. 2015 оны сүүлчээр Сан-Бернардино хотод Саид Фарук гэгч гэргий Тэшфин Маликтай хамт хөгжлийн бэрхшээлтэй иргэдэд туслах төв рүү дайран автомат буугаар гал нээснээр 14 хүн амь үрэгдэж, 21 хүн шархадсан хэрэг үйлдсэнээс хойш лалынхнаас өшөө авна хэмээн  сүрдүүлэн заналхийлдэг болжээ.