Оросын ард түмний бахархал, хөгжмийн суут зохиолч П.И.Чайковскийн “Шелкунчик” буюу “Цөмөөхэй” бүжгэн жүжгийг дэлхийн олон орон зул сарын баяраар тайзнаа тоглодог уламжлалтай. Анх 1892 оны арванхоёрдугаар сарын 18-нд Петербургийн Мариинский театрт үзэгчдийн хүртээл болж байсан энэхүү балетыг Дуурь, бүжгийн эрдмийн театрын хамт олон 1982 оноос хойш шинэ жилийн баярт зориулан тоглож, хүүхэд багачуудыг баярлуулж ирсэн.
Энэ жил ч уламжлалаа марталгүй энэ сарын 17-нд бяцхан үзэгчдийнхээ хүртээл болгохоор бэлтгэлдээ оржээ. Гурван бүлэгтэй бүжгэн жүжиг маань XVIII зууны сүүлчээр Германы нэгэн жижигхэн хотод болсон үйл явдлыг үзүүлдэг. Жүжгийн үйл явдал “Шелкунчик” сүлд модны наадам болж байгаагаар эхэлнэ. Гэрийн эзэд болон зочид Дроссельмейерийг тэсч ядан хүлээж сууна. Түүнийг ирэнгүүт цугларсан хүүхдүүд зочдын өрөөнд орно. Ингээд баяр эхэлж, бүгд хөгжилдөн бүждэг билээ. Дроссельмейер үлгэрийн шидтэн мэт хүүхэлдэйнүүдийг амилуулан бүжиглүүлж, тэдний дунд ханхүү үзэсгэлэнт охиныг харгис хулганы хааны гараас хэрхэн аварч байгааг харуулсан хэсэг нь бяцхан үзэгчдийн сэтгэлийг хамгийн ихээр хөдөлгөдөг. Дашрамд сонирхуулахад, Америкийн томоохон балетын компаниуд жилийн орлогынхоо 40 хувийг энэхүү балетын жүжгээр олдог байна.