“Умард Солонгос тив хоорондын балластик пуужин бүтээж, түүндээ цөмийн зэвсэг суурилуулах ажлаа 2018 он гэхэд дуусгана” гэж тус улсаас 2016 онд зугтаан гарч, Их Британид очсон дипломатч Тхэ Ён Хо “Рёнхап” агентлагт өгсөн ярилцлагадаа мэдэгдсэн байна.

“АНУ, Өмнөд Солонгост болсон сонгууль зэрэг улс төрийн үйл явдлуудаас болж Умард Солонгос 2017 оны сүүлч, 2018 оны эхэн гэхэд АНУ-д цохилт өгөх цөмийн толгойтой пуужин бүтээж дуусгана” гэж БНАСАУ-аас Лондонд суугаа ЭСЯ-ны зөвлөх байсан Тхэ Ён Хо ярьсныг мэдээллийн агентлаг иш татжээ.

Умард Солонгосын удирдагч Ким Чен Ун ч бас шинэ жилийг тохиолдуулан ард түмэндээ хандаж хэлэхдээ тус улс тив хоорондын балластик пуужин бүтээх ажлын төгсгөлийн шатанд орлоо гэж мэдэгдсэн юм. “Рёнхап” агентлагийн мэдээлснээр Пеньян “KN-08” пуужин бүтээж байгаа нь 13 мянган км-т тусах чадвартай гэнэ.