Б.СЭВЖИДМАА

Оросын сөрөг хүчний төлөөлөл Алексей Навальныйд шүүхээс таван жилийн тэнсэн харгалзах ял оноолоо. Үүгээр тэрээр ирэх жилийн Ерөнхийлөгчийн сонгуульд нэр дэвших боломжгүй болж байна.
Харин тэрээр шүүхийн шийдвэрийг үл харгалзан Ерөнхийлөгчийн сонгуульд нэр дэвших эрхтэй гэж мэдэгдэж байна. 2018 оны Ерөнхийлөгчийн сонгуульд нэр дэвшинэ гэдгээ зарлаад байхад нь шүүхээс ял оноосон учир В.Путин өрсөлдөгчөө замаасаа зайлуулав уу гэсэн хардлага ч байна. Гэхдээ В.Путин ирэх онд нэр дэвших эсэхээ одоогоор зарлаагүй байгаа билээ.

Түүнтэй сонгуулиар халз өрсөлдөнө хэмээн бэлтгэж байсан А.Навальныйгийн хувьд Кировлес мужийн амбан захирагчийн зөвлөхөөр ажиллаж байхдаа 16 сая рублийн үнэ бүхий гуулинг завшиж, төрийн компанийн хөрөнгийг шамшигдуулсан гэдэг үндэслэлээр тэнсэн харгалзах ялаар шийтгэгдэж, хагас сая рублийн торгууль хүлээсэн юм.  Гэвч тэрээр шүүхийн шийдвэрийг улс төрийн зорилготой, өөрийг нь сонгуульд дэвших вий гэж Кремль айж байгаа учраас ийм шийдвэр гаргалаа гэжээ.Гэхдээ Үндсэн хуулинд заасан эрхийн дагуу сонгуульд оролцох бүрэн боломжтой гэж үзэж байгаа аж. Гэвч энэ нь  хууль зүйн хувьд боломжтой эсэх нь тодорхойгүй. Тус улсын сонгуулийн хуулинд сүүлийн 10 жилийн хугацаанд ноцтой гэмт хэрэгт холбогдон, гэм буруутай нь тогтоогдсон хүн сонгуульд нэр дэвших эрхгүй байдаг аж. Мөн шоронд биеэр ял эдэлж байсан хүн сонгуульт албан тушаал хашихыг Үндсэн хуулиараа хориглосон байдаг.
Харин Навальный энэ хуулийн заалтын эсрэг яаж нэр дэвших нь тодорхойгүй байна.