4-р сарын 21-ны өдөр МЗХ-ны Залуус танхимд “Мэдлэгийн эрэлд-2017” номын үзэсгэлэн болох гэж байгаа билээ. Тус өдөрлөгийн үеэр олон сонирхолтой үйл ажиллагааг зохион байгуулах юм байна. Тухайлбал уншсан номоо солилцох, зохиолчийн гарын үсэгтэй ном худалдан авах, сүүлийн үеийн хамгийн өндөр борлуулалттай номын танилцуулга болохоос гадна зарим номууд 10-50 хувь хүртэл хямдрах юм байна. Мөн МЗХ-ны дэргэдэх клубүүдэд элсэх хүсэлтэй залууст зориулан танилцуулга, мэдээлэл өгөх юм.
Өдөрлөгт Интерном, Аз хур номын дэлгүүрүүд хамгийн их борлуулалттай номын танилцуулга хүргэх юм. Мөн Хайрын шүлгийн “Цагаан Уул-2016” наадмын тэргүүн байрны шагналт Г.Сэр-Од, яруу найрагч Н.Минжинсайхан, 5-р байрын шагналт МЗЭ-ийн гишүүн, яруу найрагч А.Сүлэгмээ, МЗЭ-ийн гишүүн Г.Сэр-Одын шагналт, яруу найрагч Я.Отгонбаяр, “Хүүгийн Нүүдэл” номын зохиолч М.Дархижав зэрэг зохиолч нар хүрэлцэн ирж уншигч нартай уулзалт, ярилцлага хийх юм байна.
Тус номын үзэсгэлэнг “Батхийморь” ХХК, “Битпресс” ХХК, “Гэгээ Паблишн” ХХК, “Аз хур” ХХК, “Интерном” ХХК, “Соёмбо Принтинг” ХХК, Нобелийн шагналтнуудын номын сан зэрэг байгууллагууд хамтран зохион байгуулж байгаа юм.
