Хятадын Жухай хотод дэлхийд хамгийн томд орох агаар, усанд явагч AG600 нисэх онгоц туршлаа гэж “Женьминь Жибао” сонин мэдээлжээ. Шинээр бүтээсэн энэ онгоцыг цаашид хятадын нисэх онгоцны China Aviation Industry General Aircraft Co үйлдвэр үргэлжлүүлэн турших юм байна.

Дөрвөн тийрэлтэд хөдөлгүүртэй, 12 тонн усыг ердөө гуравхан минутад сорж ачих чадалтай энэ онгоцны далавчны урт нь 39,3 метр бол, нийт урт нь 38,8 метр гэнэ. Онгоц агаарт 4,5 мянган км нисч түймэр унтраах хүчин чадалтай.

Ойн түймэр унтраах, далай тэнгист аврах ажиллагаа явуулах, усны хил хамгаалах, ажиглалт хийх зориулалттай энэ аварга онгоцоо Зохион бүтээгчид тавдугаар сард туршаад, оны хагас гэхэд ашиглалтад өгнө гэж өнгөрсөн гуравдугаар сард мэдэгдэж байсан юм.

Жухай хотын нисэх буудалд болсон эхний энэ туршилтаар онгоцны зогсоох төхөөрөмжүүд, залуурын боломж, маневрлах чадвар зэргийг туршихад бүгд онц үнэлгээ авчээ.

Оросуудын үүний өмнө ашиглаж байсан агаар усанд явагч “Альтаир” хэмээн Бе-200 онгоц нь хятадын энэ онгоцонд арай хүрэхгүй юм. Энэ онгоцны далавч 32,5 метр бол биеийн урт нь 32,7 метр, агаарт нийт 3100 км нисэх чадвартай.