Их Британид өнөөдөр Парламентын ээлжит бус сонгууль болж өглөө 7,00 цагт тус улсын сонгуулийн санал хураах 40 мянган байр үүдээ нээн санал хурааж эхэлсэн байна. Энэ удаагийн сонгуульд санал өгөх 46,4 сая сонгогч нэрсийн жагсаалтад бүртгүүлсэн юм байна.

Санал хураах ажил орон даяар 22,00 цагт дуусч сонгуулийн дүнг баасан гарагийн өглөө  гэхэд эцсийн байдлаар зарлах юм.
Энэ сонгуулиар парламентын 650 депутатыг сонгож эндээс талаас илүү хувийн санал авсан нам Засгийн газраа бүрдүүлэх эрх олж авна.

Сонгуулийн өмнө хамгийн сүүлд болсон судалгаагаар санал асуулгад оролцогсдын 42 хувь нь Ерөнхий сайд Тереза Мейгийн тэргүүлсэн Консерваторуудын намын төлөө саналаа өгөхөд бэлэн байна гэсэн бол 35 хувь нь тэдний өрсөлдөгч Лейбористуудын намыг дэмжиж байна гэжээ.