Их Британид баасан гарагт болсон парламентын ээлжит бус сонгуулийн эцсийн дүнг зарлалаа. Сонгуулийн бүхий л тойрог хэсгийн саналын хуудсыг тоолж дуусахад Консерватив нам парламентад хамгийн олон суудал авсан  нь тодорхой байна.

Тооллогын дүнгээс үзэхэд консервативчууд 318 мандат авсан бол түүний гол өрсөлдөгч лейбористууд 262 суудал авахаар болжээ. Гуравдугаар байрт Шотландын үндэсний нам 35 суудал авсан байна. Либерал ардчилсан нам 12, Ардчилсан нэгдлийн нам 10, Уэльсийн нам гурван суудал авчээ. Ногоонтны нам мөн нэг суудал авсан байна.

Парламентын ээлжит бус энэ сонгуулийг Европын холбооноос гарах асуудлаар Брюссельтэй хийх хэлэлцээрийнхээ өмнө өөрийн байр суурийг бэхжүүлэхийн тулд Ерөнхий сайд Тереза Мэй санаачилсан юм.

Сонгуулийн дүнгээс үзэхэд Их Британийн 650 суудалтай парламентад аль ч нам олонхи болж чадаагүй байна.