Оросын байлдаантай цуврал киноноос бидний олонтаа харж, танил болсон энэ жүжигчин бол Анатолий Пашинин. Энэ зургийг та киноны нь зургаас гэж бодож байвал эндүүрэл. Тэрээр Донбасст салан тусгаарлагч босогчдын эсрэг Украины төлөө байлдаж яваа нь энэ.

Анатолий Пашинин 1978 онд Украины Светловодск хотноо  цэргийн хүний гэр бүлд мэндэлсэн. Сургуульд байхдаа бокс, тулааны урлагаар хичээллэдэг байгаад Запорожийн Инженерийн академийн металлургийн болон, хүрээлэн байгаа орчны эдийн засаг гэсэн хоёр ангийг нэгэн зэрэг төгссөн юм байна. Дараа нь Москвад театрын дээд сургууль төгсөөд 2001 оноос кинонд тоглож эхэлжээ.

Энэ үеэсээ л Путины засаг захиргааны явуулж байгаа бодлогын эсрэг байсан байна. 2013 онд оросын бүртгэгдээгүй “Шинэ хүч” намын гишүүн болж Москвад болж байсан жагсаал арга хэмжэнүүдэд нь оролцдог байжээ.
2014 онд Оросоос явж Украиныхаа Запорожид очиж Евромайданыг дэмжин улмаар дорнод Украинд ирэн салан тусгаарлагчид, тэдний талынхны эсрэг дайнд оролцож эхэлжээ.

Хамгийн сүүлийн мэдээгээр тэрээр одоо Донбасс дахь Украины сайн дурын армийн наймдугаар батальонд алба хаан байлдаж байгаа юм байна.

Нэрт зохиолч, найруулагч Виктор Мережко энэ тухайд нь “Энэ бол хамгийн эмгэнэлтэй төгсгөлд хүрнэ. Яана вэ, түүнийг алчихна шүү дээ. Оросын эх орончид, офицеруудын дүрд тоглож байсан, гэтэл одоо орос хүмүүсийг хараагаад явж байх ч гэж.....” гэж хэлсэн байна.

Анатолий Пашинин ч өөрөө сэтгүүлчдэд Украины зэвсэгт хүчний сайн дурын цэрэг болоод “Украиныг хамгаалж” явна гэдгээ мэдэгдсэн байна.