Засгийн газрын хэрэг эрхлэх газрын харьяа Монгол төрийн түүхийн музейн үзэсгэлэнгийн танхимд "Төрт ёс хаадын сан"-гийн "Шилдэг бүтээлүүдийн дээжис" үзэсгэлэн нээлтээ хийх юм байна. Тус сан нь Монголын төрт ёсны 2000 жилийн түүхтэй эзэн хаадынхаа намтар цадигийг заншлан судлах, хэвлэн нийтлэх, уншигч түмэндээ толилуулан сурталчлах, хаадын сэдэв агуулга бүхий урлагийн бүтээлүүдийг туурвих, улмаар хойч үеийнхэндээ их хаадаараа бахархах сэтгэл төрүүлэх эрхэм зорилго бүхий байгууллага юм.