АНУ-ын төрийн Департаментын Боловсрол соёлын товчооны “Америк хөгжим гадаадад” хэмээх соёлын солилцооны хөтөлбөрийн дагуу Грэммийн шагналд нэр дэвшсэн Сэт Глиер ба түүний амьд хөгжмийн гурвал хамтлагийнхан ирэх сард манай улсад ирж тоглолтоо толилуулахаар болжээ.
Сонирхол татахуйц нэгэн мэдээлэл нь тус хамтлагийнхантай мөр зэрэгцэн хамтран тоглохыг хүсч буй Монгол хөгжимчин, уран бүтээлчдийг сонгон шалгаруулах аж. Учир нь, Сэт Глиерийн Гурвал ирэх сарын
6-8-ны өдрүүдэд Улаанбаатарт хийх аялан тоглолтынхоо үеэр Монголын уламжлалт болон орчин үеийн хөгжимчид, уран бүтээлчидтэй тайзнаа хамтран тоглохыг хүсчээ.
Тиймээс Улаанбаатар дахь АНУ-ын ЭСЯ нь бүх төрлийн хөгжмийн стиль, хэв маягаар тоглодог дотоодын хөгжимчдийг хамтран ажиллах саналаа ирүүлэхийг хүссэн байна. Амжилттай саналын эзэд Сэт Глиерийн Гурвалтай 2018 оны 4 дүгээр сарын 7-ны өдөр Улсын филармонийн тайзнаа концертонд хамтран тоглох аж. Саналаа ирүүлэх уран бүтээлч, хөгжимчдийг соёлын солилцоогоор дамжуулан хоёр орны хамтын ажиллагаа, харилцан ойлголцол, тогтвортой харилцааг хөгжүүлэх нийтлэг зорилготойгоор тус хамтлагтай ижил төстэй, эсвэл тэс ондоо хөгжмийн урсгал, жанраар уран бүтээл туурвих чадамж дээр нь үндэслэн сонгон шалгаруулах юм байна. Хамтран ажиллах саналыг энэ сарын 19-ний өдөр хүртэл pao@usembassy.mn цахим шуудангаар хүлээж авах нь.