ВАШИНГТОН. /ТАСС/. Ираны цөмийн хөтөлбөрийн асуудлаархи хэлэлцээрээс АНУ-ыг гаргах шийдвэр нь Иран улс Ойрхи Дорнодыг эзлэн авахаас урьдчилан сэргийлсэн юм гэж үзэж байгаагаа АНУ-ын Ерөнхийлөгч Дональд Трамп “Твиттер” хуудсаараа дамжуулан мэдэгдсэн байна.

“Ираны цөмийн хөтөлбөрийн асуудлаархи хэлэлцээрийн нөхцөлүүдийг АНУ дагаж мөрдөж байхад Иран улс маш зохимжгүй үйлдэл гаргаж байсан. Иран улс Ойрхи Дорнодыг ямар ч үнээр хамаагүй эрхшээлдээ оруулж авахыг оролдож байсан бол одоо ийм зүйл болохгүй” гэж тэрбээр тэмдэглэжээ.

 

Ираны цөмийн  хөтөлбөрийн асуудлаархи хэлэлцээрээс АНУ-ыг гаргах тухайгаа Д.Трамп энэ сарын 8-нд зарласан билээ. 2015 оны 6 дугаар сард НҮБ-ын Аюулгүй Зөвлөлийн байнгын гишүүн ОХУ, Их Британи, БНХАУ, АНУ, Франц улс болон ХБНГУ, түүнчлэн Иран улс Ираны цөмийн хөтөлбөрийн асуудлаархи хэлэлцээрийг байгуулсан билээ. Үйл ажиллагааны хамтарсан цогц төлөвлөгөө хэмээх уг гэрээ ёсоор НҮБ, АНУ болон Европын Холбооны зүгээс Ираны эсрэг авсан хориг арга хэмжээг цуцалсан юм.