“Хятад орныг танин мэдэх” – Хятад, Өвөр монголын соёл аялал жуулчлалын өдрүүд есдүгээр сарын 4-8-ны өдрүүдэд Улаанбаатар хотод болох юм.

Энэ удаагийн соёл, аялал жуулчлалын өдрүүдийн арга хэмжээг хоёр улсын Элчин сайдын яамд, Хятадын төрийн зөвлөлийн хэвлэл мэдээллийн алба болон Монголын сэтгүүлчдийн нэгдсэн эвлэл болон хэвлэл мэдээллийн байгууллагууд хамтран, дэмжиж зохион байгуулна.

Уг арга хэмжээний гол зорилго нь хоёр улсын хүмүүнлэгийн харилцаа хамтын ажиллагааг гүнзгийрүүлэх, Хятадын соёлтой танилцах, хоёр талын найрамдлыг зузаатгахад чиглэнэ хэмээн  ӨМӨЗО-ны Ардын засгийн газрын хэвлэл мэдээллийн дарга Хан Юун Шян хэллээ.

Соёл, аялал жуулчлалын өдрүүдийн хүрээнд үзэсгэлэн, уран сайхны тоглолт, хоёр улсын эмч нарын үнэгүй үзлэг оношлогоо, тэмцээн уралдаан гэх мэт өргөн цар хүрээг хамарсан гурван хэсгээс бүрдэх таван өдрийн 11 цогц арга хэмжээг зохион байгуулах аж. Энэ удаа соёлын өдрүүдийг аялал жуулчлалтай хослуулж хийж байгаагаараа онцлогтой гэдгийг албаныхан онцлов.

“Хятад орныг танин мэдэх” – Хятад, Өвөр монголын соёл аялал жуулчлалын өдрүүдийн хүрээнд нийслэлийн кинотеатруудад Хятадын орчин үеийн шилдэг уран сайхны 10 киног үзэгчдийн хүртээл  болгохоос гадна Сычуаний “Цагаан могойн домог” жүжгийг тайзнаа тавих аж. Мөн есдүгээр сарын 6, 7-нд Өвөрмонголын ХААИС болон Монгол Улсын ХААИС хамтарч экологийн соёл иргэншлийн тухай лекц, “Байгаль дэлхийгээ хамгаалъя: Хятадын Өвөрмонголын цөлжилтөөс сэргийлж зассан практик” үзэсгэлэн, ШУТИС Өвөрмонголын Аж үйлдвэрийн их сургууль хамтарч технологийн инноваци сэдэвт лекц үзэсгэлэнг ту тус зохион байгуулах юм байна. Мөн Монголын ТВ2 телевизээр Хятадын  “Миний аав ушү чадна” уран сайхны киног толилуулах аж.

Түүнчлэн соёл аялал жуулчлалын өдрүүдэд, хоёр улсын эмч нарын үнэ төлбөргүй оношлогоо, ном хэвлэл, аялал жуулчлалын танилцуулга, их, дээд сургуулиуд хоорондын солилцоо, спортын тэмцээн, хэвлэл мэдээллийн солилцоо зэрэг арга хэмжээг зохион байгуулах юм байна.