БСШУСЯ-ны Соёл, урлагийн бодлогo зохицуулалтын газрын дарга Б.Сэргэлэн, Соёл урлагийн бодлого зохицуулалт, соёлын хөдлөх өвийн асуудал хариуцсан шинжээч Б.Даваацэрэн нар Монголын Үндэсний музейн үйл ажиллагаатай танилцаж, бэлэн байдлын зэрэгт шилжиж, хорио цээрийн дэглэм хэрэгжиж буй үед авч хэрэгжүүлж буй болон цаашид авах арга хэмжээний талаар санал солилцлоо. Монголын Үндэсний музейн хамт олон Улсын онцгой комисс, БСШУСЯ-наас ирүүлсэн зөвлөмж, чиглэлийн дагуу төлөвлөгөө гарган ажиллахын зэрэгцээ байнгын үзүүллэгийн хоёр танхимыг засварлан, нэг танхимыг шинэчлэн дэглэж, бөс даавуу эдлэл бүхий үзмэрийн сан хөмрөгийг төрөлжүүлсэн юм. Түүнчлэн музейн каталогийг англи хэлээр бэлтгэн хэвлэлд шилжүүлээд байна. Мөн олон улсын байгууллагатай хамтран хэрэгжүүлж буй төслүүдийн талаар тухайлбал, АНУ-ын Элчин сайдын соёлын өвийг хамгаалах сангаас жил бүр дэлхий даяар зарладаг төслийн уралдаанд Монголын Үндэсний музей, Америкийн монгол судлалын төвтэй хамтран оролцож, 96 мянган ам долларын санхүүжилт авах болсон талаар танилцууллаа. Энэхүү төсөл нь “Монголын музейн нэхмэл цуглуулгын хадгалалтыг сайжруулах” зорилготой юм.