Дэлхий даяар COVID-19-ийн халдварын тархалт ирэх зургаан сард ч үргэлжилнэ гэж судлаачид анхаарууллаа. Дэлхийн нийт хүн амын 90-95 хувь нь халдварын эсрэг дархлаатай болсноор халдварыг хумьж чадна гэж тооцоолж байна.

Дархлаажуулалтын явц сайн байгаа АНУ, Их Британи, ОХУ, Израилд COVID-19-ийн халдварын тархалт оргил үедээ хүрээд байгаа юм. Харин Дани, Сингапур зэрэг улс халдварыг харьцангуй сайн хумьж байгаа гэдэг утгаараа хязгаарлалтын арга хэмжээгээ сулруулсан байна. БНХАУ, Хонгконг ч халдварын тархалтыг бууруулахаар эрчимтэй ажиллаж байгаа юм.

Европын Холбоо, Хойд Америк, БНХАУ вакцинжуулалтаар тэргүүлж байгаа бол Африкийн ихэнх улс хүн амынхаа тав хүрэхгүй хувийг л вакцины бүрэн тунд хамруулжээ.

Үүнээс гадна Их Британи ирэх долоо хоногоос эхлэн 12-оос дээш насны хүүхдүүдийг вакцинжуулалтад хамруулахаар болсон байна. Ингэснээр хүүхдүүдийн хичээл сургалтыг үргэлжлүүлэхэд дэмжлэг болно гэж тус улсын Засгийн газар үзэж байгаа ажээ.

Эх сурвалж:http://bloombergtv.mn/