Өнөөдөр Монголын эрүүл мэндийн сэтгүүлчдийн “Цагаан үзэг” холбооноос эрүүл мэндийн чиглэлээр дагнан ажилладаг сэтгүүлчдийн дунд “Илүү сайн маргаашийн төлөө” санал солилцох уулзалтыг зохион байгууллаа.

 “Цагаан үзэг” холбоо нь эрүүл мэндийн чиглэлээр дагнан ажилладаг бие даасан сэтгүүлчдийн санаачлага, зорилгын дор 2021 оны 10 дугаар сард үүсгэн байгуулагджээ. Тус холбоо нь олон нийтийн эрүүл мэндийн талаарх мэдлэг ойлголтыг дээшлүүлэхэд чиглэсэн, бие даасан,  ашгийн бус байгууллага юм.

Холбооны зорилго нь эрүүл мэндийн сэтгүүлчдийг мэргэжлийн хувьд чадавхжуулах, эрүүл мэндийн сэтгүүлчдийн ёс зүйн болон ур чадварын хамгийн сайн стандартыг бий болгох, эрүүл мэндийн сэтгүүлчдийн  хүчирхэг нэгдлийг бий болгож хөгжүүлэх, иргэдийн эрүүл мэндийн боловсролыг дээшлүүлэхэд салбарын байгууллагуудтай хамтран ажиллах, сэтгүүлчид болон мэдээллийн эх сурвалж хоорондын харилцан ойлголцлыг бэхжүүлэх, олон нийтийн дундах эрүүл мэндийн сэтгүүл зүйн ач холбогдол,  нэр хүндийг нь өсгөхөд чиглэнэ гэлээ.

Өнөөдрийн уулзалтаар 20 орчим сэтгүүлч болон эрүүл мэндийн салбарын төлөөллүүд оролцож санал солилцлоо. Уулзалтаар эрүүл мэндийн чиглэлээр дагнан ажилладаг сэтгүүлчдийг чадавхижуулах, эрүүл мэндийн сэтгүүлчдийг нэгтгэн салбарын бодлогод өөрсдийн дуу хоолойг хүргэх, хүн амд эрүүл мэндийн боловсрол олгох чиглэлд судалгааны ажлуудыг зохион байгуулж зэргээр оролцогчид санал солилцлоо.  

Эрүүл мэндийн сэтгүүл зүйг хөгжүүлэх их үйлсийн хүрээнд тус холбооны дэргэдэх Эрүүл мэндийн “Вакцин” клубээрээ дамжуулан гишүүн байгууллага болон сэтгүүлчдийнхээ өсөлт хөгжлийг дэмжин ажиллахаар сургалт, судалгааны ажлуудыг зохион байгуулахаар төлөвлөжээ.