ХӨСҮТ-ээс томуу, томуу төст өвчний нөхцөл байдлын талаар мэдээлэл хийлээ. ХӨСҮТ-ийн Томуугийн үндэсний төвийн дарга А.Бурмаа "Өнөөдрийн байдлаар амбулаториор үйлчлүүлж буй нийт өвчлөгсдийн ес орчим хувь нь томуу, томуу төст өвчнөөр оношлогдож байна. Эмнэлэгт хэвтэж байгаа нийт хэвтэн эмчлүүлэгсдийн 15 орчим хувь нь амьсгалын замын цочмог хүнд халдвартай байна. Улсын хэмжээнд бүртгэгдэж байгаа томуу томуу төст өвчлөгсдийг насны бүлгээр авч үзвэл 90 орчим хувийг 15 хүртэлх насны хүүхдүүд эзэлж байна" гэв.
ХӨСҮТ-ийн Эмнэлгийн тусламж, үйлчилгээ хариуцсан дэд захирал Ц.Чинбаяр "ХӨСҮТ-ийн Яаралтай тусламжийн тасагт нэг хоногт дунджаар 200 гаруй хүүхэд үйлчлүүлдэг. Тэдний 50 хувь нь эмнэлэгт хэвтэн эмчлүүлж байна. Хэвтэн эмчлүүлж байгаа хүүхдийн 85 хувь нь 0-3 насныхан байгаа бөгөөд тэдний 20 хувь нь гар хөл амны халдварын шалтгаантай байна. Харин эрчимт эмчилгээний тасагт дөрвөн хүүхэд амьсгалын замын халдварын хүнд хэлбэрээр оношлуулан, эмчлүүлж байна.
ХӨСҮТ-д өнөөдрийн байдлаар амьсгалын замын халдварын улмаас 206 хүүхэд хэвтэн эмчлүүлж байна. Үүний:
- 70 гаруй хувь халуурах
- 60 хувьд ханиалгах
- 15 хувь хоолой бачуурах, ларингитын шинж
- 10 хувьд бөөлжих, суулгах зэрэг шинж илэрч байна.
Бага насны хүүхдүүд, жирэмсэн эхчүүд, хууч өвчтэй ахмадууд томуугаар өвчилсөн тохиолдолд хүндрэх эрсдэлтэй учир томуугийн вакцинд хамруулах хэрэгтэй байна. Ингэснээр учирч болзошгүй эрсдэлийг бууруулна" гэлээ.
