БНХАУ-д хүүхдүүдийн дунд хүнд хэлбэрийн уушгины хатгалгааны нэмэгдэж буй талаар ХӨСҮТ-ээс мэдээлэл өглөө.

БНХАУ-ын Эрүүл мэндийн төв байгууллагаас арваннэгдүгээр сарын 13-нд Бээжин, Манжуур зэрэг хойд хэсгийн бүс нутгуудад уушгины хатгалгаа нэмэгдэж байна гэж мэдээлжээ. Тодруулбал, микоплазмын шалтгаант уушгины хатгаа ковид, томуугийн халдварын хамт нэмэгдсэн байна. Ковидын хязгаарлалтын цуцалснаар амьсгалын замын халдвар нэмэгдсэн гэж дүгнэсэн байна.

Микоплазмын шалтгаант хатгаа нь хүн амын дунд бүртгэгдэж байдаг, шинэ биш гэдгийг ХӨСҮТ-ээс онцлов.  Өвчлөлийн үед амьсгалын дээд замын шинж тэмдэг илэрдэг ч хатгаа болж хүндэрдэг, насанд хүрэгчдэд хөнгөн хэлбэрээр явагддаг ч 0-5 насны хүүхэд хүндрэх эрсдэлтэй байдаг байна.

ХӨСҮТ дээр хоёр удаагийн эрсдэлийн үнэлгээ хийхэд Монгол Улс дунд зэргийн эрсдэлтэй гэсэн дүгнэлт гарчээ.

Иймд ханиалгах, халуурах, зарим үед хүүхдэд чихний үрэвсэл болдог тул иргэд эрүүл мэндийн байгууллагад хандахыг зөвлөж байна. Хилээр зорчихыг хязгаарлахгүй ч БНХАУ-д зорчоод ирсэн тохиолдолд 7-21 хоногийн хугацаанд өөрт ямар нэгэн шинж тэмдэг илэрч байгаа эсэхийг ажиглахыг зөвлөлөө.