Израил болон Палестины Хамас бүлэглэл хоорондын дайны хөлд нэрвэгдээд байгаа Газын Хан Юнис хот дахь Нассер эмнэлэгт эм, эмнэлгийн тусламжийн бараа амжилттай хүрсэн байна. Энэ тухай мэдээллийг ДЭМБ-ын дарга Тедрос Адханом Гебрейюс хэвлэлхийнхэнд өгчээ. Нассер эмнэлэгт байгаа 1,000 орчим өвчтөнд эмнэлгийн тусламжийн бараа амжилттай хүрсэн боловч хоол хүнсний тусламж хүргэх ажил бүтэлгүйтсэнийг Гебрейюс мэдэгдсэн байна.
Израилийн тал бөмбөгдөлтөө үргэлжлүүлсээр байгаа энэ үед Газ дахь Палестины энгийн иргэд хүмүүнлэгийн тусламж хүрч чадахгүй байгаагаас болж өлсөж үхэхэд тулаад байна. Тиймээс дайтагч талуудыг түр гал зогсоох хэлэлцээрт зуучлагч орнууд уриалаад байгаа юм. Зуучлагчид Францын нийслэл Парис хотод цуглаад байна.
Манай албан ёсны эх сурвалж болох Agence France-Presse агентлагийн зүгээс Палестины Хамас бүлэглэл Газад зургаан долоо хоногийн турш гал зогсоох саналыг дэмжиж байна гэж мэдээлжээ. Энэ удаагийн түр гал зогсоох хэлэлцээрт Катар болон Египет улсууд тэргүүлэн зуучлах үүргийг гүйцэтгэж байгаа юм. Мөн Хамас бүлэглэлийн удирдагч Исмаил Хание лхагва юм уу пүрэв гарагт Египетийн нийслэл Каир хотод түр гал зогсоох хэлэлцээрийг дэмжиж очно гэжээ. Түр гал зогсоох хэлэлцээрийг байгуулж чадсанаар Газын зурваст өлбөрч үхэхдээ тулаад байгаа палестинчуудад хүмүүнлэгийн тусламж, хоол хүнс хүргэх боломжтой болно.
Гал зогсоох хэлэлцээр гурван үе шаттай байх бөгөөд эхний хэсэгт нь Газад хүмүүнлэгийн тусламжийн бараа хүргэх бол дараагийн шатанд Хамас бүлэглэлд барьцаалагдаад байгаа хүүхэд, эмэгтэйчүүд, 60-аас дээш насны хүмүүсийг Израилийн шоронд хоригдож байгаа палестин хоригдлуудаар солилцох санал багтаж байна. Уг хэлэлцээрийн хамгийн чухал нь Газаас Израилийн цэрэг армийн хүчийг эргүүлэн татах тухай яригдаж байна.
