Нийслэлийн Чингэлтэй дүүргийн 7 дугаар хороо, Баянхошууны шинэ буудал орчимд байрлах “Миний” дэлгүүрийн агуулахад гал гарсан. Галыг унтраахаар ажиллаж байсан хоёр алба хаагч хөнгөн бэртэж, эмнэлгийн тусламж авч байгаа бол нэг алба хаагчийг харамсалтайгаар амиа алдсан юм.

ОБЕГ-аас энэ асуудалтай холбоотой мэдээлэл өгөх үеэр амиа алдсан алба хаагчийн ар гэрээс асуулт асуусан юм. Тэрээр "Тэтгэвэрт гарах хугацаа нь болчихсон байсан. Тэтгэвэрт гарах хүсэлтээ өнгөрсөн жилийн есдүгээр сараас хойш удаа дараа өгсөн. Өнөөдрийн хүртэл тэтгэвэрт нь гаргаагүй. Өмнө нь хоёр жил завсарлаж байсан. Учир нь ажлаа хийж байгаад түлэгдсэн. Онцгой байдлын байгууллагын эмнэлэг 30 хувийн түлэгдэлтэй гэсэн дүгнэлт гаргасан. Тэр нь 30 биш 80 хувийн түлэгдэл байсан. Тэрийгээ эмчлэх гээд хоёр жил чөлөө авсан. Тэр шалтгаанаас болоод тэтгэвэрт гарах хүсэлтийг нь хүлээж аваагүй. Хэрэв хүсэлтийг нь хүлээж авсан бол таван хүүхэд нь өнөөдөр элэг бүтэн байгаа" гэв.

Түүний асуултад ОБЕГ-ын алба хаагчид "Тухайн алба хаагч өргөдөл өгсөн эсэхийг хүний нөөцөөс тодруулаад мэдээлэл өгье. Улсын онцгой байдлын байгууллагын алба хаагчид тодорхой хугацаанд алба хаасны үндсэн дээр тэтгэвэрт гардаг хууль дүрэмтэй байгаа" гэсэн юм.