Үндэсний их баяр наадмыг тохиолдуулан 2024 оны долоодугаар сарын 10-ны өдөр Д.Сүхбаатарын талбайд Б.Дамдинсүрэн Б.Смирнов нарын “Учиртай гурван толгой” дуурийг нийтийн хүртээл болгоно.Гол дүрийн сонгон шалгаруулалт амжилттай явагдаж өндөрлөлөө.
Нийслэлийн Засаг дарга бөгөөд Улаанбаатар хотын захирагч Х.Нямбаатарын санаачлагаар "Учиртай гурван толгой" дуурийг төв талбайд толилуулахаар болсон бөгөөд дүрийн шалгаруулалтыг Улсын дуурь бүжгийн эрдмийн театр явуулсан юм.
Гол дүрийн сонгон шалгаруулалтын шүүгчээр ардын жүжигчин А.Дашпэлжээ, удирдаач ардын жүжигчин Ч.Чинбат, хөгжмийн зохиолч Ш.Өлзийбаяр, УДБЭТ-ын ерөнхий найруулагч С.Баттулга, УДБЭТ-ын ерөнхий удирдаач Ц.Тэлмүүн-Очир, хяналтын шүүгчээр НЗДТГ-ын Нийгмийн бодлогын хэлтсийн ахлах мэргэжилтэн Д.Оюунгэрэл, УДБЭТ-ын захирал Б.Сарантуяа нар ажиллалаа.
Шүүгчдийн нэгдсэн дүнгээр тус дуурийн гол дүрд дуулах уран бүтээлчдийн нэрс тодорлоо.
ЮНДЭН-д гавьяат жүжигчин Э.Анхбаяр
НАНСАЛМАА-д УДБЭТ-ын гоцлол дуучин Б.Энхнаран
БАЛГАН-д гавьяат жүжигчин УДБЭТ-ын гоцлол дуучин О.Хүрэлбаатар
ХОРОЛМАА-д УДБЭТ-ын гоцлол дуучин Б.Одонзаяа
ХУДАЛДААЧИН-д УДБЭТ-ын гоцлол дуучин Э.Отгонбат
БҮҮВЭЙЧ-д УДБЭТ-ын гоцлол дуучин М.Дариймаа нар тус тус шалгарлаа.
Сонгон шалгаруулалтад мэргэжлийн урлагийн байгууллагын болон орон нутгийн театр чуулгуудаас 30 гаруй мэргэжлийн уран бүтээлчид оролцжээ.
Юндэн, Балган, Нансалмаа, Хоролмаа нарын дүрд шалгарсан шилдэг уран бүтээлч тус бүрт 20 сая, худалдаачин, бүүвэйч нарыг 10 сая төгрөгөөр шагнах юм.
