2018 оноос хойш жил бүр зохион байгуулагдаж буй Шанхайн экспо нь дэлхий нийтийн хамтын ажиллагаа, худалдааны шинэ боломжийг эрэлхийлэх үндсэн зорилготой
Ерөнхий сайд Л.Оюун-Эрдэнэ “Хятадын олон улсын импортын VII экспо”-ийн нээлтэд хэлсэн үгэндээ “Монгол Улс Шанхайн экспод идэвхтэй оролцох нь БНХАУ төдийгүй бусад улстай эдийн засгийн харилцаа холбоогоо гүнзгийрүүлэх өргөн боломжийг нээсээр ирсэн. Монгол Улс, БНХАУ хоорондын худалдааны эргэлт 2023 оны байдлаар 17.6 тэрбум ам.доллар хүрсэн бол цаашид 20 тэрбум ам.доллар хүргэхийг зорьж байгаа”-гаа онцоллоо.
Мөн “Монгол Улсын Засгийн газар хиймэл оюунд түшиглэсэн цахим, ухаалаг технологийг хөгжлийн хурдасгуур болгох, ногоон хөгжлийн шилжилтийг хэрэгжүүлэх, хүний нөөцийн шилжилтэд анхаарч, ирээдүйн хөгжлөө төлөвлөх зэрэг шилжилтүүд хийхийг зорьж буй”-гаа тодотгов.
Монгол Улсын аж ахуйн нэгжүүд энэ удаагийн экспод ноос, ноолуураас гадна уул уурхайн салбарынхаа хөгжил дэвшил, зах зээлд өрсөлдөх боломжийг танилцуулж байна. Тухайлбал: “Эрдэнэс Тавантолгой”, “Ньюком групп”, “Макс групп”, “Капитал Маркет Монгол” зэрэг компани 10 гаруй аж ахуйн нэгж “Шанхайн экспо”-д оролцож байгаа юм.
“Шинэ эрин үед ирээдүйгээ хамтдаа хуваалцъя” уриа дор болж буй “Хятадын олон улсын импортын VII экспо”-ийн нээлтийн ёслолд Пакистан, Серби, Словак, Узбекистан, Малайз, Казахстан улсын Ерөнхийлөгч, Ерөнхий сайд нар оролцсон байна.
2018 оноос хойш жил бүр зохион байгуулагдаж буй Шанхайн экспо нь дэлхий нийтийн хамтын ажиллагаа, худалдааны шинэ боломжийг эрэлхийлэх үндсэн зорилготой бөгөөд хүнс, хөдөө аж ахуйн бүтээгдэхүүн, автомашин, ухаалаг үйлдвэрлэл болон мэдээлэл технологи, өргөн хэрэглээний бараа, эрүүл мэндийн бүтээгдэхүүн болон тоног төхөөрөмж, худалдаа үйлчилгээ гэсэн хэсгүүдээс бүрдэж байгаа аж.
Зургаан удаагийн экспод 173 улс, бүс нутаг, олон улсын байгууллага оролцож, нийт 420 тэрбум ам.долларын худалдан авалт, борлуулалтын гүйлгээ хийж, 2500 нэр төрлийн бүтээгдэхүүн, үйлчилгээ, инновац, дэвшилтэт шинэ технологи танилцуулсан байна.
