Засгийн газрын Хяналт хэрэгжүүлэх газар, Монголын Бүтээмжийн Төвтэй хамтран төрийн байгууллагын үйл ажиллагааны чанар, бүтээмжийг дээшлүүлэх арга хэмжээг системтэйгээр хэрэгжүүлэх, улмаар олон улсын түвшинд жишиг болохуйц загвар байгууллагыг бий болгох төслийн бэлтгэл ажлыг ханган ажиллаж байна.

Төсөлд Нийгмийн даатгалын Ерөнхий газар сонгогдож, төслийг хэрэгжүүлэхээр боллоо. Дээрх төслийг хэрэгжүүлснээр төрийн албаны бүтээмж, үйлчилгээний чанар сайжрахаас гадна туршлагаа түгээн дэлгэрүүлэх боломж бүрдэх юм.

Загвар байгууллага төлөвшүүлэх төслийг хэрэгжүүлэхээр Засгийн газрын Хяналт хэрэгжүүлэх газрын дарга Ч.Өнөрбаяр, Нийгмийн даатгалын ерөнхий газрын дарга Б.Батжаргал, Монголын Бүтээмжийн Төвийн гүйцэтгэх захирал Я.Эрхэмбаяр нар “Төрийн байгууллагын төгөлдөршил, загвар байгууллагын төсөл”-д хамтран ажиллах гурван талт гэрээнд /2025.04.07/ гарын үсэг зурлаа.

Энэ үеэр Нийгмийн даатгалын ерөнхий газрын дарга Б.Батжаргал “ Хоёр жилийн өмнө Засгийн газрын Хяналт хэрэгжүүлэх газраас процессын дахин инженерчлэлийг манай салбар дээр хийсэн. Жишээлбэл,

Нийслэлийн нийгмийн даатгалын байгууллагыг нэгтгэж, үр ашиггүй орон тоог бууруулах, ил тод байлгах, шат дамжлага, хүнд суртлыг багасгах зарчмыг хэрэгжүүлж ажиллаж байгаа. Цаашид бид үйлчилгээг илүү хүртээмжтэй болгох зорилгоор чармайлт гаргаж ажиллах болно” гэж хэлэв.

Төсөл хэрэгжсэнээр Монгол Улсад сайн засаглал төлөвшиж, төрийн байгууллагуудын үйл ажиллагаа иргэдэд ээлтэй, ил тод болоход чухал хувь нэмэр оруулах юм.