Нийслэлд өнөөдөр усархаг бороо үргэлжлэн орно. Үүнтэй холбогдуулан нийслэлийн Онцгой байдлын газрын Шуурхай штабаас нөхцөл байдал, авч хэрэгжүүлж буй арга хэмжээний талаар мэдээлэл өглөө.

Цаг уурын байгууллагаас өнөөдөр 05:00-07:00, 14:00-16:00, 20:00-00:00 цагийн хооронд усархаг бороо орохыг мэдээлж, сэрэмжлүүлж байна.  Улаанбаатар хотод өнөөдөр 05:00-07:00 цагийн хооронд 1.5-3 мм хэмжээтэй бороо оржээ. Улаанбаатар хотод 15:00 цагаас хойш усархаг аадар бороо орно, аюулт үзэгдлийн хэмжээнд хүрнэ гэсэн таамгийг хүргүүлсэн. Иймд Үдээс хойш орох борооны эрчим нэмэгдэх тул шуурхай албад онцгойлон бэлтгэл ханган ажиллаж буй юм байна.  

Одоогоор БЗД, СБД-ийн авто замын уулзварт ус тогтсон гэх дуудлага мэдээлэл Улсын онцгой комиссын Шуурхай штабт ирсэн байна. Одоогоор үер, усны аюултай холбоотой дуудлага мэдээлэл ирээгүй байгааг мэдээлэв.

Хотын дарга Х.Нямбаатар өнөөдөр үүсэж болзошгүй эрсдэлийг тооцоолон дүүргүүдийн шуурхай штаб, Засаг дарга нарт 8 үүрэг өгчээ. Тухайлбал, үер ус тогтож болзошгүй 95 цэгт бэлтгэл, бэлэн байдлыг хангах, В1 давхар зэрэг цахилгааны систем, авто зогсоол байрладаг хэсэгт хамгаалалтын далан үүсгэх зэрэг үүрэг өгсөн байна.

Мөн “Төрийн захиргаа, холбогдох мэргэжлийн байгууллагууд өнөөдөр уртасгасан цагаар ажиллана, тиймээс цагтаа тарна гэдэг асуудал байж болохгүй” гэдэг үүрэг, даалгаврыг УОК-ын дарга, Шадар сайд С.Амарсайхан өгчээ.