COP17-ын Ногоон бүсийн өнөөдрийн хөтөлбөр “Хүн төвт өдөр” сэдвийн дор үргэлжилж, газар нутгийг сэргээх, хамгаалах шийдлийн төвд хүний оролцоог тавьж байна.

Газрын доройтол, цөлжилттэй тэмцэхэд зөвхөн бодлого, технологи бус, газар нутагтайгаа өдөр тутам шууд харилцдаг орон нутгийн иргэд, малчид, тариаланчид, эмэгтэйчүүд, залуучуудын эрх, мэдлэг, туршлага, оролцоо чухал болохыг НҮБ-ын Цөлжилттэй тэмцэх тухай конвенцоос онцолжээ.

Өнөөдрийн Ногоон бүсийн хөтөлбөрөөр газрын засаглал, эрх ба бодлого, иргэний нийгмийн оролцоо, жендерийн тэгш байдал, эмэгтэйчүүдийн газрын эрх, орон нутагт түшиглэсэн газар сэргээх шийдэл, шинжлэх ухаан ба мэдлэг, залуучуудын манлайлал, эмэгтэй тариаланчдын тогтвортой хүнсний тогтолцоонд оруулах хувь нэмэр, уламжлалт болон орон нутгийн мэдлэг зэрэг сэдвийг хэлэлцэж байна.

COP17-ын хүрээнд залуучууд, малчид, жижиг тариалан эрхлэгчид, уугуул болон орон нутгийн иргэдийн оролцоог бодлого, шийдвэр боловсруулах үйл явцтай илүү нягт холбохыг зорьж байгаа юм.

Мөн хурлын өргөн хүрээний хөтөлбөрөөр газрын нөхөн сэргээлт, гангийн тэсвэртэй байдал, ус, бэлчээр, хүнсний тогтолцооны асуудлыг бодит хэрэгжилттэй холбож, олон талын оролцоог нэмэгдүүлэхэд анхаарч байна.