Монгол Улсын Засгийн газар, Жендерийн Үндэсний Хороо, Канад–Монголын MERIT төсөл хамтран Цөлжилттэй тэмцэх тухай НҮБ-ын Талуудын 17 дугаар бага хурлын хүрээнд “Ногоон ирээдүйн түншлэл: Эмэгтэйчүүдийн манлайлал” төрийн албан хаагч эмэгтэйчүүдийн форумыг зохион байгууллаа.
Ногоон бүсийн Өгөөдэй танхимд болсон тус форумд 21 аймаг, нийслэл, дүүрэг, яам, агентлаг болон төрийн бусад төв байгууллагыг төлөөлсөн 130 гаруй эмэгтэй оролцлоо.
Байгаль орчин, уур амьсгалын өөрчлөлтийн яамны төлөөлөл оролцож, төрийн албанд ажиллаж буй эмэгтэйчүүдийн манлайлал, шийдвэр гаргах түвшин дэх оролцоог нэмэгдүүлэх, ногоон хөгжил, уур амьсгалын өөрчлөлт, цөлжилт, газрын доройтлын асуудлыг шийдвэрлэхэд эмэгтэйчүүдийн оролцоо, хамтын ажиллагааг өргөжүүлэх чиглэлээр санал, туршлага солилцов.
