Цаг агаарт зориудаар нөлөөлөх үйл ажиллагааны хөгжил, шинжлэх ухаан, технологийн шинэчлэлийн талаар хэлэлцүүлгийг өнөөдөр Цаг уур, орчны шинжилгээний газраас Ногоон бүсийн “Өгэдэй” танхимд зохион байгууллаа.
Тус хэлэлцүүлэгт Дэлхийн цаг уурын байгууллага, Тайланд улсын Хааны бороо хөдөө аж ахуйн агаарын тээврийн газар, Франц улсын Цаг уурын алба, МУИС болон эрдэм шинжилгээний байгууллагын төлөөлөл оролцлоо.Цаг уур, орчны шинжилгээний газрын дарга Э.Баттулга тус хэлэлцүүлгийг нээж хэлсэн үгэндээ “Цаашид шинжлэх ухаанд суурилсан, үр дүнгээ бодитоор хэмждэг, орчин үеийн технологи ашигладаг, байгаль орчин, хүний эрүүл мэндийн аюулгүй байдлыг хангасан цаг агаарт зориудаар нөлөөлөх тогтолцоог хөгжүүлэхийн зэрэгцээ эрт сэрэмжлүүлэг, цаг агаарын урьдчилсан мэдээ, гангийн эрсдэлийн үнэлгээ, усны менежменттэй уялдуулах явдал чухал“ болохыг онцлон тэмдэглэлээ.Өнөөдрийн хэлэлцүүлгээр цаг агаарт зориудаар нөлөөлөх үйл ажиллагааны шинжлэх ухааны үндэслэл, технологийн шинэчлэл, үр нөлөөний үнэлгээ, эрх зүй, бодлогын орчин, санхүүжилт, хүний нөөцийн чадавх болон олон улсын хамтын ажиллагааны талаар өргөн хүрээнд хэлэлцлээ. Тус хэлэлцүүлэг нь Монгол Улсад цаг агаарт зориудаар нөлөөлөх үйл ажиллагааг шинжлэх ухаан, технологид суурилсан, үр дүнтэй, тогтвортой хөгжүүлэх боломжийг тодорхойлохын зэрэгцээ цаашдын бодлого, төлөвлөлт, хамтын ажиллагааны чиглэлийг тодорхойлоход чухал ач холбогдолтой юм.Оролцогчид цаг агаарт зориудаар нөлөөлөх үйл ажиллагаа нь шинжлэх ухааны үндэслэл, бодит ажиглалт, судалгаа, үр нөлөөний үнэлгээнд тулгуурлах шаардлагатайг онцоллоо. Мөн хиймэл оюун ухаан, тоон загварчлал, цаг уурын радар, хиймэл дагуул болон орчин үеийн ажиглалтын технологийг нэвтрүүлэх нь үйл ажиллагааны үр нөлөө, үр дүнг дээшлүүлэх чухал боломж болохыг тэмдэглэв.Түүнчлэн Монгол Улс өөрийн хуримтлуулсан туршлага, мэдлэгээ олон улсын шинжлэх ухааны ололт, технологийн дэвшилтэй хослуулахын зэрэгцээ бүс нутгийн хамтын ажиллагааг өргөжүүлж, мэдлэг, туршлага, технологи солилцоог эрчимжүүлэх шаардлагатай гэж санал нэгдлээ.
Цаг уур, орчны шинжилгээний газар
United Nations Convention to Combat Desertification See less
