Компьютерийн гар хамгийн бохир, олон төрлийн нян агуулж байдгийг бид мэднэ. Тэгвэл гар утас түүнээс дутахгүй элдэв төрлийн бохир нян агуулж байдгийг төдийлэн мэдэхгүй. Саяхан Их Британийн 12 хотод судалгаа хийж гар утас хэр бохир бөгөөд хүнд өвчин дамжуулах эрсдэлтэй болохыг судалсан байна. Судалгаанд 390 хүний гар утсыг эзнийх нь гартай хамт шинжлэхэд 82 хувь нь ямар нэг төрлийн нян агуулж байгаа нь илэрчээ. Үүнээс 16 хувь нь маш аюултай “Е.Coli” хэмээх бактери үүсгэгчтэй байж. “Е.Coli” бол хүн бие зассаны дараа гараа угааж цэвэрлээгүйгээс ихэвчлэн үүсдэг нян. Өөрөөр хэлбэл ялгадаснаас үүсдэг гэсэн үг. Энэ нянгаас үүссэн өвчин өнгөрсөн жил улаан лооль, өргөст хэмх зэрэг хүнсний ногоогоор дамжин Европт халдварлаж, хэдэн зуун хүн өвчилж, бүр нас барсан ч удаатай. Тиймээс таны гар утсанд үхлийн аюултай нян ч нуугдаж байж болзошгүй. Тэгэхээр гараа тогтмол угааж, гар утсаа ч цэвэр байлгах хэрэгтэй байх нь. Хамгийн гол нь, ариун цэврийн өрөөнд орсон тохиолдолд заавал гараа угааж байж гар утсаа ашиглахгүй бол эргээд утаснаасаа нян авч ч болзошгүй юм. Учир нь, гар утастай харьцаж байгаа хүний гар үүрэн телефон ашиглаагүй хүмүүсийнхээс гурав дахин их бохирддог байна. Ер нь, гар утас ч гэлтгүй зээлийн карт, АТМ-ийн товчлуур, шатны бариул, хэтэвч, дэлгүүрийн түрдэг тэрэг гээд нян ихээр агуулдаг зүйлс мундахгүй олон шүү.