Ядуу өрх айл, хүмүүсийг таних хамгийн хялбар арга нь илүүдэл жин хэмээн Их Британийн Эрүүл мэндийн сайд мэдэгдлээ.  Урьд цагт бол сургууль цэцэрлэгт туранхай хүүхдүүдийг тэжээлийн дутагдалтай, ар гэрийнх нь амьдрал тааруу юм гэж үздэг байсан бол орчин цагт энэ бүхэн эсрэгээрээ эргэж, илүүдэл жинтэй, тарган хүүхдүүдийн ар гэрт анхаарал тавихаар болжээ.
Учир нь, түргэн хоол, хагас боловсруулсан бэлэн бүтээгдэхүүн их дэлгэрсэн өнөө үед барууны орнуудад ядуу өрх айлууд уламжлалт аргаар хүнсээ бэлтгэж, эрүүл зохистой хоол хийж идэхээ бараг больжээ. Тэд хямд үнэтэй түргэн хоол, лаазалсан бэлэн бүтээгдэхүүнийг ихэвчлэн сонгож байна. Үүнийг дагаад хүүхдүүд нь багаасаа таргалж, илүүдэл жинтэй болж байгаа юм. Харин амьдрал нь боломжийн айл өрхүүд зах зээлд арай өндөр үнэтэй органик хүнс ногоогоо илүү хэрэглэж байгаа учраас хүүхдүүд нь ч хэвийн жинтэй байгаа юм.   
Таргалалт гэдэг хүн амын дунд томоохон асуудал болсон Их Британийн хувьд нийт хүүхдүүдийн гуравны нэг нь илүүдэл жингээсээ болоод сургуулиасаа гарч, завсардаж байгаа гэсэн тоо бий гэнэ. Тэр бүхний ард санхүүгийн чадавхи сул гэр бүл байгаа гэж Эрүүл мэндийн сайд үзэж байна. Хүүхдээ өглөө сургуульд нь явахаас өмнө ээжүүд хоол хүнс гараараа бэлтгэж өгдөг байсан уламжлал өнөөдөр ихэнх гэр бүлд үгүй болж, бэлэн бүтээгдэхүүн авч өгч байгаа нь эргээд хүүхдүүдийнхээ эрүүл мэндийг эрсдэлд оруулах болжээ. Үүнээс үүдэн ядуу өрх айлын хүүхдүүд дунд таргалалт хоёр дахин их байгаа гэсэн судалгаа гарчээ.