Бахрейны гүнж Нура Бинт Эбрахим аль Халифа гурван ч хүнийг тарчлаан зовоосон хэргээр шүүхэд дуудагдаад байна. Бахрейны Эмийн  хяналтын газарт ажилладаг гүнж өнгөрсөн 2011 онд Бахрейны эрх баригч  Халифагийн гэр бүлийн эсрэг гарсан жагсаалд оролцоод, бэртэж гэмтсэн хүмүүсийн эмчилсэн  ах, дүү хоёр эмчийг хоригдож байхад нь тарчлаан зовоосон гэнэ. Мөн 21 настай бүсгүйг хааны гэр бүлийг шүүмжилсэн шүлэг бичсэний төлөө хоригдож байхад нь нүдийг нь боож байгаад кабелиар ороолгон зодож, хүчиндүүлнэ хэмээн сүрдүүлж байжээ. Хохирогч бүсгүйн нүдний боолтныхоо завсаар гүнжийн царайг харж таньсан нь өнөөдөр түүнийг шүүхэд авчраад байгаа юм. Энэ хэргийн улмаас хохирогч бүсгүй их сургуулиасаа хөөгдөн, өдөр бүр заналхийлсэн захидал, сүрдүүлэг хүлээн авдаг ч харгис гүнжийг хууль шүүхийн өмнө авчрахын тулд тэмцлээ үргэлжлүүлнэ гэж мэдэгджээ. Ойрхи Дорнод, Арабын орнуудад гарсан Арабын хавар буюу эрх баригч дэглэмээ эсэргүүцсэн тэмцэл хөдөлгөөн 2011 оны эхээр Бахрейд гарсан боловч Халифагийн гэр бүл хүчээр дарсан юм.