Чехэд болсон Ерөнхийлөгчийн сонгуулиар 54,8 хувийн санал авч тус улсын ерөнхийлөгчөөр сонгогдоод байгаа, ерөнхий сайд асан Милош Земан улсынхаа тэргүүн хатагтайгаар гэргий Ивоноо биш харин 18 настай охин Катежинагаа өргөмжилжээ. Тэрээр “Катенька чи миний албан ёсны бус тэргүүн хатагтай болооч” гэж охиндоо хэлэхэд тэр нь зөвшөөрчээ. Гэргий Ивона нь олон хүн оролцсон элдэв арга хэмжээнд дургүйгээрээ алдартай нэгэн. Тэрээр сонгуулийн эхний шатны дүн гарахыг хүлээж чадалгүй, сонгуулийн штабаас гэрээдээ явчихсан гэнэ. Харин охин Катежина нь сонгуулийн кампани эхэлсэн өдрөөс л аавыгаа дэмжиж уулзалт, ярилцлага, хэвлэлийн бага хуралд нь байнга хамт байсан юм.