Голландын хатан хаан Беатрикс хаан ширээгээ хүүдээ шилжүүлэн өгөх гэж байгаагаа мэдэгдлээ. 33 жилийн өмнө мөн л ээжээсээ хаан ширээ хүлээн авч байсан эрхэм дээдэс 75 насандаа том хүү, хунтайж Уиллем Александерт төр барих эрхийг ийнхүү шилжүүлэхээр шийджээ. Хатан хаан хэлэхдээ “Хаан ширээ шилжүүлэх тухай сүүлийн хэдэн жил бодсоны эцэст шинэ залуу үеийнхэндээ үүрэг хариуцлага үүрүүлэх цаг нь болсон гэж үзлээ. Гэвч алба ажил маань нүсэр хүнд учраас дааж давж чадахгүйдээ бууж байгаа хэрэг биш улс орноо залуу хүмүүст хүлээлгэн өгөх нь зөв гэж бодсоных юм. Энэ олон жил та бүхний хатан хаан байх эрхийг олгосонд туйлын их талархаж байна” гэжээ. Хаан ширээг залгамжлуулах ёслол ирэх дөрөвдүгээр сарын 30-нд болох юм байна. 1890 оноос хойш дандаа хатан хаантай байсан Голланд анх удаа эзэн хаантай болох гэж байгаа юм. Шинэ хаанаар өргөмжлөгдөх гэж буй Оранжийн хунтайж Уиллем Александр одоо 45 настай. Тэрээр Аргентиний язгууртан угсаа гарал үгүй бүсгүйтэй гэрлэж, гурван хүүхэдтэй болсон юм.

Хатан хаан ийнхүү хаан ширээнээсээ буух болсон нь хүүгийнх нь биеийн байдалтай холбоотой хэмээн таамаглаж байна. Хатан хааны хоёр дахь хүү, хунтайж Фризо өнгөрсөн гуравдугаар сард Австрид амарч явахдаа цасан уруйд дарагдан осолдсон юм. Үүний улмаас тархи нь хүчилтөрөгчийн дутагдалд орж, одоо хүртэл комп байгаа юм.