Энэ зургуудыг та хараад алдартай оддын ердийн л нэг гэрэл зургууд гэж бодож байна уу. Тэгвэл тийм биш ээ. Гайхалтай нь эдгээр зургийг хүний гараар бүтээжээ. Ердөө л харандаагаар энэ бүхнийг зурсан гэдэгт анх харсан хүн ер итгэмгүй. Гэвч Келвин Окафор хэмээх авъяаслаг зураач залуу яах аргагүй харандаагаар эдгээр зургийг урлаж, үзэсгэлэнгээ гаргаад байна. 

Нигериэс Их Британид цагаачлан ирсэн хар арьст гэр бүлээс гаралтай Келвин амьдралын боломжгүйгээс хүүхэд байхдаа гадагшаа гарч, тоглож зугаацах ч аргагүй байж. Гэртээ бүх л өдрийг өнгөрөөдөг байсан хүү хамаг цаг хугацаагаа зураг зурахад зориулжээ. Энэ авъяасынхаа хүчээр тэр одоо өөрийн чин хүсэл эрмэлзэлтэй уран зургийн чиглэлээр их сургуульд суралцах болж, олон нийт ч түүний гайхамшигт авьяас чадварыг мэддэг болжээ. Тэрээр нэг хөрөг зургаа ойролцоогоор 80-100 цагийн хугацаанд зурдаг бөгөөд 800-3000 фунт хүртэл үнээр худалддаг байна. Тэрээр зургаа зурахдаа фото зурагтай ажиллахыг илүүд үздэг бөгөөд гэрэл зургийг хэдэн ч цагаар хамаагүй ажиглан харж суудаг байна.

Үүнээс ерөнхий хар зургаа толгой дотроо гаргаад зүүн нүднээс нь эхэлж зурдаг байна. Зүүн нүд , тэгээд хамар, дараа нь зүүн хацар, уруул гээд яг л энэ дарааллаараа зурдаг гэнэ. Дөрвөн цаг зураад, хагас цаг амраад, дахиад 4-5 цаг суугаад, дахиад хагас цаг амарна. Түүнээс хойш бол хэр удаан сууж чадна тэр хэмжээгээрээ л сууж зургаа гараас гаргадаг бөгөөд ингэхэд нийтдээ 80-100 цаг болдог байна.