Н.Наранбаатарыг сайн найруулагчаас гадна халамжтай, сайн аав гэдэг. Тэрээр гэр бүлийн нандин холбоо, үнэ цэнийг залуучуудад ойлгуулахаар зорьж, нэрт зохиолч Ч.Лодойдамбын “Гарын таван хуруу” зохиолыг дэлгэцийн бүтээл болгохоор ажиллаж байна. Өмнө нь энэхүү зохиолоор найруулагч И.Нямгаваа кино бүтээж байсан ч Н.Наранбаатар түүнийхээс өөр өнцгөөр илэрхийлэхийг зорьж байгаа гэнэ. Тиймээс өмнө нь бүтээсэн киноны үргэлжлэл гэж ойлгож болохгүй аж.
Түүний зорилго бол гэр бүл салах нь хүүхдийн амьдрал, үзэл бодолд хэрхэн нөлөөлдгийг харуулах явдал. Одоогоор киноныхоо зохиол дээр ажиллаж байгаа гэсэн. Ирэх зунаас зургаа авч эхлэх юм байна. Н.Наранбаатар Шагдарт хэнийг тоглуулахаа хүртэл товлочихсон гэнэ.