Францын цэргийн нисэх онгоцууд Малийн умард нутаг дахь Кидал хотод байгаа исламын зэвсэгт бүлэглэлийн байрлал руу агаараас цохилт өгсөн байна. Цэргийн 30 онгоц Алжирын хилээс холгүй орших Тессалит нэртэй уулархаг бүс нутагт байрладаг босогчдын дасгал сургуулилтын төв рүү дайрчээ. Тус улсад өнгөрсөн долоо хоногийн сүүлчээр айлчилсан Францын ерөнхийлөгч Франсуа Олланд Малийн умард нутаг дахь босогчдыг дарсны дараа  сэргээн босгоход франц улс тусламж үзүүлнэ гэж амлажээ. Франц улс засгийн газрын эсрэг босоод байгаа исламын зэвсэгт бүлэглэлийг дарах үйлст сүүлийн гурван долоо хоногийн хугацаанд тусалж байгаа юм. Өнгөрсөн лхагва гарагт франц, малийн цэргийн хүчин Кидал хотын нисэх буудлыг босогчдоос чөлөөлсөн ч туарегуудын эрхийн төлөө тэмцэж байгаа босогчид хотыг хяналтдаа байлгасаар байгаа юм.