Тайландын нийслэл Бангкокоос холгүй хоёр цаг яваад хүрэх газарт “Барсын хийд” оршино.  Энд лам хуврагууд нь хэдэн арван бартай хамт амьдардаг болохоор “Барсын хийд” гэж нэрлэсэн нь энэ.
Энэ хийд тосгоны оршин суугчдын ойгоос олсон  барын бамбарыг анх 1999 онд хүлээн авч байсан бол 2011 он гэхэд 85 бар, түүний 40 нь янз бүрийн насны бамбартай болжээ. Бар, бамбарууд ихэвчлэн торон дотор байдаг байснаа 2011 оны зун барсдаа зориулсан арал бий болгож, торноос нь чөлөөлжээ.

 Энэ арал 1000 акр хэмжээтэй болохоор барсууд бүр чөлөөтэй. Эндхийн барс их тансаг, тахианы чанасан мах, муурын бэлэн хоол  иднэ. Хийдийн хамбын хэлснээр бол барсаа хооллоход эднийхэн  өдөрт лавтай 100 ам.доллар зарцуулдаг гэнэ. Хийдэд өдөртөө эргэл мөргөлчдөөс авахуулаад, жуулчин гээд 300-600 хүн зочилж ирнэ. Хийдийн орчмыг үзэхэд дунджаар 2,5 цаг зарцуулна.

Барс нь хар багаасаа хүмүүстэй цуг амьдарч, өссөн болохоороо ч тэр үү, аялагч жуулчин, гаднын хүмүүс рүү халдахгүй, айж бэргэхгүй.
Энэ хийдийн эзэмшил нутагт ганцхан бар ч биш өөр олон төрлийн 300 гаруй амьтан бий. Буга, нэг бөхт тэмээ, сармагчин, үхэр гээд л.... Нэг ёсондоо энэ хийд амьтдын жаргалын орон доо.