Хятадын Жежиан мужийн Венжоу хотод засаг захиргааны хоёр ажилтныг хүүхдийн аминд хүрсэн хэргээр баривчлаад байна. Тэд нэг хүүхэд бодлогыг зөрчиж, гурван хүүхэдтэй болсон нэг  гэр бүлд очиж, ой нэг сартай хүүхдийг нь булаацалдан маргаан дэгдээж байхдаа газар унагааж, аминд нь хүрсэн байна. Түүгээр барахгүй хүүхдийг газар уначихаад байх үед жолооч нь хөдөлснөөс болоод хүү албаны машины дугуйнд дайрагджээ. Бяцхан хүү эмнэлэгт хүрэх замдаа амьсгал хураасан юм.
Энэ балмад явдал олны чихэнд хүрч, уурссан олон нийт орон нутгийн засаг захиргааны гадна жагсаал хийн эсэргүүцэл зарласны хүчинд буруутай этгээдүүдийг баривчлан шалгаж эхэлжээ. Хятадад 30 гаруй жил үргэлжилж буй нэг хүүхэд бодлогыг зөрчиж, нэгээс дээш хүүхэдтэй болсон гэр бүл засаг захиргаандаа торгуулийн мөнгө төлөх ёстой байдаг. Хүүгийн эцэг эх ч 30-40 мянган юанийн торгууль уначихаад байсан бөгөөд төлөх ямар ч боломжгүй байжээ. Тэд энэ их торгуулийн мөнгийг төлж чадахгүй хэмээн албаныхантай маргалдаж, хүүхдээ булаацалдаж байх үеэр энэ золгүй явдал тохиолджээ. Нэг хүүхэд бодлоготой холбоотой энэ мэт харгис явдал Хятадад үе үе гардаг.  Өнгөрсөн зургадугаар сард Фен Жианмей хэмээх эмэгтэйг бас л нэг хүүхэд бодлогын улмаас долоон сартай жирэмсэн байхад нь хүчээр үр хөндөж, амьгүй болсон хүүхдийнх нь цогцсыг хажууд нь тавьсан зураг хэвлэл мэдээллийн хэрэгслээр ил болж, олныг цочирдуулж байсан билээ.