Ардын жүжигчин С.Сарантуяатай цөөн хором ярилцлаа.
 
-Сар шинэдээ сайхан шинэлэв үү. Цагаан сараар УДЭТ-ынхан “Оролмаа эх” жүжгээр үзэгчдэд бэлэг барьсан. Оролмаа эхийн дүрийг амилуулан үзэгчдэд хүргэх гээд зав тааруу байв уу?
-“Оролмаа эх” жүжгийг Д.Намдаг гуайн 100 насны ойд зориулан могой жилийн босгонд хоёр дахь удаагаа үзэгчдэд хүргэлээ. Энэ удаа жүжгийг гавьяат жүжигчин Ч.Найдандорж найруулан үзэгчдийн хүртээл болгосон. “Оролмаа эх”-д тоглоод энэ жил Д.Намдаг гуайн нэрэмжит шагнал, оны шилдэг “Мөнгөн мод”-ыг авлаа. Надад хариуцлага нэмж, санаанд оромгүйгээр үнэлэгдсэн “Оролмаа эх” дүрдээ хайртай болохоор үзэгчдийн өмнө тайзан дээр гарахыг тэсэн ядан хүлээх болсон.
-Жүжигчин хүн өөрөө дүрдээ дурлах тусам үзэгчдийг татдаг юм шиг ээ?
-Мэдээж,  тэгэлгүй яахав. Тэгж байж л үнэн дүрийг гаргана шүү дээ. “Оролмаа эх” жүжгийн зохиол, бичгийн хэл зүй үнэхээр гайхамшигтай. Монгол хэлний аялгуу дуудлагыг мэдрүүлэхээр тийм л сайхан жүжиг.
-Удахгүй “Гэгээн муза” наадам болно. Та энэ жилийн наадамд ямар бүтээлээр оролцох вэ?
-Өнгөрсөн жил УДЭТ-т Б.Галааридын “Эсрэг дурлал”, У.Шекспирын “Гамлет” жүжгийг тоглосон. Би энэ жүжгүүдэд дүр бүтээгээгүй. Тиймээс энэ удаагийн наадамд өрсөлдөхгүй. Харин наадмын зохион байгуулалтад орж ажиллана.