Хөдөлмөрийн сайд Я.Санжмятав өнгөрсөн амралтын өдөр гаригт Өмнөговь аймгийг зорьж Ханбогд сумын нутагт орших “Оюутолгой” ХХК-д ажиллалаа. Тус компанид одоогийн байдлаар 8000 гаруй иргэн ажиллаж байгаагаас 80 орчим хувь нь Монгол ажилчид аж. Монгол ажилчдын нэг сарын цалин 1.5 сая төгрөгөөс эхэлдэг байна. Хөдөлмөрийн сайд энэ удаад “Оюутолгой” ХХК-д зочлох үеэрээ тус компанид ажиллах монгол ажилтныг хэрхэн сургаж байгаа, мөн ямар шалгуур хангасан хүн тус компанид ажиллах бололцоотой болдог, монгол ажилчдын нийгмийн ахуй хангамж ямар байгаа, хөдөлмөрийн аюулгүй байдлыг тус компани хэрхэн хангаж ажиллаж байна вэ зэрэг асуултыг тодруулах зорилготойгоор ажиллажээ.

Шинэчлэлийн Засгийн газар байгуулагдсан үеэс Хөдөлмөрийн яамыг тусад нь бие даан байгуулж,  ажиллах болсон. Ингэхдээ Боловсрол,  соёл,  шинжлэх ухааны яаманд харьяалагдаж байсан Мэргэжлийн боловсролын салбарыг Хөдөлмөрийн яам хариуцан ажиллахаар болсон билээ. Тиймээс Монгол Улсын Засгийн газартай хамтран байгуулсан гэрээний дагуу “Оюутолгой” ХХК нь мэргэжилтэй боловсон хүчин бэлтгэх чиглэлээр ямар ажлууд хийсэн, цаашид ямар чиглэл барьж ажиллаж байгаа зэргийг тодруулахад энэ удаагийн ажлын айлчлалын зорилго бас оршиж байсан юм.