В.И.Лениний музейн сан хөмрөг, үзмэр, үзүүлэнтэй холбоотой асуудлаар ССАЖЯ-наас өчигдөр ЦЕГ-ын дарга, бригадын генерал Б.Билэгтэд “Үзмэр алга болсон эсэх асуудлыг  шалгуулах тухай” албан бичиг илгээлээ. ССАЖЯ-наас МАН-д тус музейд хадгалж байсан үзмэрүүдийг хүлээн авах асуудлаар удаа дараа хандсан боловч ямар нэг шалтгаангүйгээр хүлээлгэн өгөхөөс татгалзсан юм. В.И.Лениний музейд хадгалж байсан 5000 орчим үзмэр болон бусад соёлын дурсгалт зүйлсийг МАН-аас төрийн ямар нэгэн байгууллагад хүлээлгэн өгөөгүй билээ.
Мөн тус музейд хадгалж байсан үзмэрүүдийн ерөнхий бүртгэл хаана байгаа нь тодорхойгүй. Энэ нь, музейн үзмэр, соёлын дурсгалт зүйлсэд хайхрамжгүй хандан үрэгдүүлсэн байж болзошгүй гэж үзэхэд хүргэж буй В.И.Лениний музейг хүлээж авах ажлын хэсгийн ахлагч ССАЖЯ-ны Төрийн нарийн бичгийн дарга П.Алтангэрэл ярьсан юм.  
Тиймээс музейн үзмэрийг алга болгосон эсэх, музейн ерөнхий бүртгэлийн дэвтэрийг санаатайгаар нуун дарагдуулсан эсвэл үрэгдүүлсэн үү гэдгийг шалгуулахаар цагдаагийн байгууллагад хандсан байна.
Монгол Улсын Үндсэн хуулийн долдугаар зүйлийн 1-д “Монголын ард түмний түүх, соёлын дурсгалт зүйл, шинжлэх ухаан, оюуны өв төрийн хамгаалалтад байна”, Соёлын өвийг хамгаалах тухай хуулийн 10 дугаар зүйлийн 10.1-д “Төрийн өмчлөлд байгаа түүх, соёлын дурсгалт зүйлийг сурталчлах, судалгаа, шинжилгээ, сургалт явуулах зориулалтаар ашиглана” гэж заасан байдаг. Эдгээр хуулийн дагуу В.И.Лениний музейд хадгалж байсан үзмэрүүдийг ССАЖЯ хадгалж хамгаалах шаардлагатай тул  ийнхүү үзмэрүүдийг буцаан цуглуулах ажлыг эхлүүлсэн байна.