Хүний амьдралд тохиолдох бүхий л хайрыг 100 яруу найрагч магтан дуулах нь. Энэ сарын 30-нд болох хайрын уншлагын талаар Залуу зохиолчдын нэгдлийн дарга, Г.Сэр-Одын нэрэмжит шагналт яруу найрагч Ч.Ууганбаяраас тодрууллаа.

-Сайн байна уу. “Ардчилал” сониноос ярьж байна. Тун удахгүй болох 100 яруу найрагчийн хайрын шүлгийн уншлагын талаар тодруулах гэсэн юм. Оролцох яруу найрагчдад ямар нэг шалгуур тавьж байгаа юу?
-Хайрыг магтан дуулаагүй, энэ талаар шүлэглээгүй яруу найрагч энэ орчлонд нэгээхэн ч үгүй. Монголын Зохиолчдын эвлэлийн дэргэ­дэх “Залуу зохиолчдын нэг­дэл”-ээс санаачлан МЗЭ, “Хязгааргүй дуулал” ТББ-тай хамтран яруу найргийн чөлөөт уншлага зохион байгуулах гэж байна. Үе үеийн төлөөлөл болсон найрагчдыг хамруулах уншлагад урилгаар “Болор цом”-ын эзэд болох П.Бадарч, А.Эрдэнэ-Очир, Д.Урианхай, Г.Мөнхцэцэг зэ­рэг шүлгээрээ овоглож яваа яруу найрагч  оролцоно. Залуу үеийн төлөөлөл болсон яруу найрагчид ч оролцохоо илэрхийлсэн. Одоогоор 70 гаруй найрагч бүртгүүлээд байна.
-Ийм олон яруу най­рагчдыг нэгтгэсэн уншлага ашгийн төлөө бус гэсэн. Яруу найраг сонирхдог хүмүүст таатай мэдээ дуулгасан байна билээ?
-Өдөрлөг “Өргөн орчлонд хүн хайраар дутаж болохгүй” гэсэн уриан дор энэ сарын 30-нд Үндэсний цэцэрлэгт хүрээлэнд болох юм. Урлаг соёлын нэгдсэн арга хэмжээ гэж ойлгож болно. Зөвхөн шүлгийн уншлагаас гадна хамтлаг, дуучид ая дуугаа өргөнө.

-Аливаа арга хэмжээ нэг тийш чиглэсэн байх ёстой шүү дээ. Уншлагын зорилго юу вэ?
-Нийгэм, хүн төрөлхтний оюун санаанд сайн сайхныг даллан дуудагч хайрын үнэ цэнийг хүүхэд залууст ойлгуулах, түүгээр дамжуулан хүний сэтгэлд гэрэл гэгээ бэлэглэх юм даа.

-Бүртгүүлж амжаагүй залуус хаана хандах вэ?
-МЗЭ дээр ирээд бүртгүүлэхээс гадна 88848801 гэсэн дугаарт холбогдон бүртгүүлж болно.