Монголын зохиолчдын эвлэл, Залуу зохиолчдын эвлэлээс зохион байгуулж буй 100 яруу найрагч, 100 хайрын шүлэг утга зохиолын өдөрлөг энэ сарын 30-нд Үндэсний цэцэрлэгт хүрээлэнд болох гэж байна. Энэ талаар МУСГЗ, Д.Намдагийн нэрэмжит шагналт яруу найрагч Ш.Гүрбазар, Залуу зохиогчдын нэгдлийн удирдах зөвлөлийн дарга Н.Минжинсайхан, Төрийн шагналт, СГЗ яруу найрагч , зохиолч Д.Төрбат, Залуу зохиолчдын нэгдлийн дарга Ч.Ууганбаяр, Д.Нацагдоржийн нэрэмжит шагналт, Болор цомын эзэн А.Эрдэнэ-Очир нар хэвлэлийн хурал зохион байгууллаа. Энэ үдэш Монголын нэртэй яруу найрагчид, мөн олонд танигдаагүй авьяаслаг олон залуу зохиолч уран бүтээлээсээ сор болсон нэгийг нь л уншиж олон түмний сонорыг мялаах гэж байгаа юм байна.
Ш.Гүрбазар “ Урьд хожид хэзээ ч болж байгаагүй, Монголын түүхэнд мөнхөрч үлдэх сайхан үдэш болох гэж байна. Үе үеийн шигтгээ болсон зохиолчид хамгийн сайхан гэсэн шүлгүүдээ уншиж, жинхэнэ чих баясгаж, сэтгэл хөдөлгөсөн үдэш болох нь. Яруу найраг сонирхдог, сайхан шүлгэнд дуртай хүн бүхнийг хүрэлцэн ирэхийг урьж байна. Энэ бол ахиж олдохгүй боломж юм шүү” гэлээ.