Цагаан хад гэхээр л монголчууд тоос шороо босч, түм түжигнэж, бум бужигнасан газар гэж ойлгодог болсон. Үнэндээ тэнд хүнд даацын машины дугуй, ачиж буулгаж буй нүүрсний тоос тэнгэр баганадаж хар саарал орчин угтдаг. Арга ч үгүй биз. Өдөрт 80-100 тонн даацтай 800-1000 орчим ачааны машин ирж буцдаг гэдэг. Одоогоор цагаан хаданд 1315 га талбайд нүүрс тээвэрлэдэг 55 аж ахуйн  нэгж үйл ажиллагаа явуулдаг тооцоо бий. Нүүрс тээврийн зам дагуу 20-30 км газарт хамрын тамхи шиг нарийн тоос бууж ургамлын бүрхэвчийг дарсан хэмээн нутгийнхан ярьдаг. Ойр хавьд нь нутагладаг малчдын малын уушиг нь хүнд өвчилсөн баримт ч байгаа. Иймд Засгийн газрын хуралдаанаар өнгөрсөн долоо хоногт Өмнөговь айм­гийн Гашуунсухайтын боом­тоос 23 км зайд  орших Цагаан хадны гаалийн хя­нал­тын бүсийг хаах шийдвэр гаргажээ. Энэхүү шийдвэртэй зэрэг­цүүлэн Эрдэнэс-Таван­ тол­гойн нүүрсний уурхайг түшиг­лэн Гаалийн хяналтын бүс байгуулах тооцоо, судалгааг нарийвчлан хийх үүргийг  асуудал хариуцсан сайд нарт өгсөн байна.
Цагаан хаданд газрын хөрсийг орвонгоор нь эргүүлээд зогсохгүй хогон овоо ч боссон. Энэ газарт анхнаасаа Гаалийн хяналтын бүс байгуулахын тулд Байгаль орчинд нөлөөлөх байдлын үнэлгээ хийгээгүй, засаг захиргааны ямар ч нэгжгүй байсан аж. Харин одоо уул уурхайн компаниуд Цогтцэций сум дахь Таван­толгойн уурхайгаас нүүрс тээ­вэрлэж, Ханбогд сумын нутагт байрлах Цагаан хадны Гаалийн хяналтын бүсэд гаалийн бүр­дүү­лэлт хийхгүй боллоо.  Тиймээс БОНХЯ Цагаан хадны Гаалийн хяналтын талбайн үйл ажиллагааны улмаас байгаль орчинд учруулсан хохирлын үнэлгээг тогтоох, нөхөн сэр­гээх зардлыг  тооцох ажлыг эхлүүлээд байна.